У Мінску будуць судзіць 43-гадовую жанчыну, якая абвінавачваецца ў забойстве былога мужа. Падрабязнасці крымінальнай справы расказалі ў Генпракуратуры.
Паводле звестак следства, 12 лістапада мінулага года абвінавачаная, знаходзячыся ў стане ап’янення, пасварылася з экс-мужам. Падчас канфлікту яна збіла яго рукамі, драўлянай швабрай і «іншымі цвёрдымі тупымі прадметамі». Потым жанчына паваліла мужчыну на падлогу, села зверху, абкруціла пажарным шлангам шыю і задушыла. Смерць мінчука наступіла ад механічнай асфіксіі.
У абвінавачанай чацвёра дзяцей, дваім з іх — па дзевяць гадоў. Цяпер малагадовымі апякуецца 21-гадовая сястра.
Жанчыне выставілі абвінавачанне ў забойстве. Крымінальная справа вывучаная пракурорам і адпраўленая ў суд.