На продаж у Мінску 2 лістапада выставілі кватэру ў гістарычным доме ў Ракаўскім прадмесці. Яна прапануецца па цане ў 10 тысяч даляраў за квадратны метр. Гэта рэкорд на беларускім рынку нерухомасці, адзначае тэлеграм-канал «Будни риэлтора. Минск». Чаму так дорага? Мы паглядзелі, што гаворыцца ў аб’яве пра продаж.
Кватэра знаходзіцца ў доме на вул. Вызвалення, 13, на скрыжаванні з Ракаўскай. Дом цагляны, двухпавярховы, 1917 года пабудовы, з’яўляецца гісторыка-культурнай каштоўнасцю. У будынку ўсяго чатыры кватэры, усе на другім паверсе, знізу — аўташкола і стаматалогія.
Плошча кватэры — 47,8 кв. м, у ёй два пакоі, асобны санвузел, трохметровыя столі. Фішка жылля — поўная адсутнасць прамых вуглоў, адзначаюць аўтары аб’явы. Кватэра светлая, утульная, з добрым, але несучасным рамонтам. Ёсць мэбля і бытавая тэхніка — можна адразу заязджаць і жыць.
Самае прыемнае ў прапанове — лакацыя: сэрца горада, пяць хвілін да метро, побач набярэжная Свіслачы, гандлёвыя цэнтры, рэстараны і ўсе іншыя выгоды. Пры гэтым у доме ціха, запэўніваюць прадаўцы, двор дагледжаны, Няма праблем з паркоўкай.
За кватэру з самай дарагой стаўкай за метр уладальнікі хочуць атрымаць 478 тысяч даляраў.