Літоўскі бізнесовец Дайнюс Дундуліс, які валодае 13% акцый беларускай сеткі крамаў Mart Inn, уклаў у прадпрыемства больш за 4 мільёны даляраў, аднак быў вымушаны спісаць іх як страты. Ён прызнаўся LRT, што лічыць сваё рашэнне інвеставаць у Беларусь ад пачатку памылковым.
Дундуліс, якому ў Літве належыць сетка крам Norfa, а ў Беларусі — 13% акцый рытэйлера Mart Inn, заявіў, што ўклаў у беларускае прадпрыемства больш за 4 млн даляраў, аднак іх давялося запісаць у страты.
— Вы ведаеце, калі шчыра, мы ўжо тры-чатыры гады таму спісалі свой баланс, і калі нешта вернецца, значыць, вернецца, мы будзем шчаслівыя, — расказаў ён, назваўшы сітуацыю з беларускімі інвестыцыямі «непрадказальнай, як надвор’е».
Гандлёвую сетку Mart Inn у Беларусі заснавалі ў 2012 годзе Міндаўгас і Гінтарас Марцінкявічусы. Па словах Дундуліса, яны ўжо не першы год шукаюць пакупніка на яе, але пакуль не вядома, ці ўдалося каго-небудзь знайсці.
— Ведаю толькі, што самога пакупніка ўжо шукаюць, баюся сказаць, каля чатырох гадоў. Мы не ведаем выніку, ці знайшлі — асабіста я не ведаю, — адзначыў бізнесовец.
Дундуліс заявіў, што інвеставанне ў Беларусь ад пачатку было памылкай:
— Нашае рашэнне наогул выйсці на гэты рынак было няправільным, і цяпер мы маем тое, што маем.
Сам Міндаўгас Марцінкявічус таксама раскайваўся ў сваім рашэнні развіваць рознічную сетку Mart Inn у Беларусі і прызнаваўся, што ліквіднасць яго бізнесу ў нашай краіне блізкая да нуля.
— Рашэнне інвеставаць у Беларусь, я лічу, было няправільным. Гэтая краіна кардынальна адрозніваецца ад Літвы з пункту гледжання бізнес-асяроддзя, і ўмовы для інвеставання там вельмі неспрыяльныя, — скардзіўся ён.
Нагадаем, нядаўна Аляксандр Лукашэнка прыгразіў нацыяналізаваць прадпрыемствы, уладальнікамі якіх з’яўляюцца інвестары з «недружалюбных» краін.
— Літоўцы бегаюць, шукаюць, як гэта, каб не кінуць прадпрыемства, а яго добра прадаць. Дык вось яны павінныя ведаць, што ніхто нічога не прадасць з замежным капіталам. Гэта будзе нацыяналізавана. Вось і ўсё, — заявіў ён.
У Канфедэрацыі прамыслоўцаў Літвы паабяцалі не пакінуць нацыяналізацыю свайго бізнэсу ў Беларусі без адказу, калі да гэтага дойдзе. У прыватнасці, там прапанавалі выкарыстоўваць замарожаныя сродкі беларускіх кампаній, якія трапілі пад санкцыі Еўрапейскага саюза, для кампенсацыі магчымых страт інвестараў і сродкаў фізічных асоб.
