Лідарка беларускіх дэмакратычных сіл Святлана Ціханоўская 26 снежня прызначыла прадстаўніцай па сацыяльных пытаннях Аб’яднанага пераходнага кабінета былую палітзняволеную Вольгу Гарбунову — у Беларусі яна ўзначальвала аб’яднанне дапамогі жанчынам «Радзіслава».
— Прыярытэтным напрамкам дзейнасці Вольгі Гарбуновай — былой палітзняволенай — стане арганізацыя сістэмнай дапамогі палітвязням і іх сваякам. Яна таксама ўзмоцніць працу Кабінета па вырашэнні пытання палітвязняў на міжнароднай арэне, — паведамілі ў АПК.
Там назвалі абавязкі Гарбуновай на пасадзе прадстаўніцы па сацыяльных пытаннях: яна зоймецца стварэннем кансалідаванай платформы беларускіх грамадскіх ініцыятываў і арганізацый, якая павінная павысіць эфектыўнасць іх дзейнасці ў сферах прававой, сацыяльна-псіхалагічнай і гуманітарнай дапамогі.
Акрамя таго, яна будзе дапамагаць юрыстам у дапрацоўцы закона аб рэабілітацыі і іншых нарматыўна-прававых дакументаў, якія «на стратэгічным узроўні вызначаць развіццё Беларусі ў будучыні як сацыяльнай дзяржавы, з дзейсным і эфектыўным сацыяльна арыентаваным заканадаўствам, інстытутам амбудсмена (упаўнаважанага па правах чалавека) і механізмамі абароны найбольш неабароненых слаёў насельніцтва».
Вольга Гарбунова — заснавальніца прытулку для жанчын і іх дзяцей, якія пацярпелі ад хатняга гвалту, былая кіраўніца грамадскага аб’яднання «Радзіслава». Яна больш за 10 гадоў вучыла прадстаўнікоў праваахоўных органаў, сістэм сацыяльнай абароны і аховы здароўя, псіхолагаў і педагогаў працы з ахвярамі хатняга гвалту, папярэджванні яго цяжкіх наступстваў.
Нагадаем, у траўні актывістцы далі тры гады «хатняй хіміі» за арганізацыю «жаночых маршаў». Праваабаронцы прызналі яе палітзняволенай, а ўлады ўнеслі ў «спіс экстрэмістаў».
Хто яшчэ ўваходзіць у Аб’яднаны пераходны кабінет
Пра стварэнне Аб’яднанага пераходнага кабінета — «калектыўнага выканаўчага органа» — лідарка беларускіх дэмсілаў Святлана Ціханоўская абвясціла 9 жніўня на канферэнцыі «Новая Беларусь». Яна стала яго кіраўніцай, а таксама прызначыла сваіх прадстаўнікоў — былога дыпламата Валерыя Кавалеўскага, былога міністра культуры Паўла Латушку і былых сілавікоў Аляксандра Азарава і Валерыя Сахашчыка.
Пасля Латушка таксама прызначыў сабе двух намеснікаў — Арцёма Праскаловіча і Юрыя Губарэвіча: як і ён сам, яны ў свой час працавалі ў дзяржструктурах.
Прадстаўніцай па нацыянальным адраджэнні стала Аліна Коўшык, прадстаўніцай па эканоміцы і фінансах — бізнесвумен Таццяна Зарэцкая. Аднак менш чым праз два месяцы яна пакінула Кабінет — як яна патлумачыла, праз ціск і пагрозы.
Паводле вызначэння Паўла Латушкі, «Кабінет мусіць забяспечыць транзітны перыяд пераходу ўлады ў рукі народа і ліквідацыю таталітарнага рэжыму Лукашэнкі».