Напярэдадні новага навучальнага года ВНУ Беларусі павышаюць кошт навучання. Новыя цэны ўжо апублікавалі ў Беларускім дзяржаўным універсітэце інфарматыкі і радыёэлектронікі, Беларускім дзяржаўным медыцынскім універсітэце, Мінскім дзяржаўным лінгвістычным універсітэце, Акадэміі кіравання.
Так, у БДУІР з 1 верасня навучанне па дзённай форме для першага курса на факультэтах камп’ютарных сістэм і сетак, інфармацыйных тэхналогій і кіравання, інжынерна-эканамічным факультэце будзе каштаваць 4590 рублёў. На факультэтах камп’ютарнага праектавання, інфармацыйнай бяспекі, радыётэхнікі і электронікі — 4140 рублёў.
Летась кошт складаў 4290 і 3870 рублёў адпаведна. То-бок цэны павысіліся на 7%.
«Карэктаванне кошту звязанае з павелічэннем выдаткаў на камунальныя паслугі, ростам цэн на энерганосьбіты, ростам выдаткаў на ўтрыманне будынкаў і збудаванняў, падтрыманнем узроўню заробкаў прафесарска-выкладчыцкага складу ўніверсітэта», — патлумачылі ў прэс-службе БДУІР.
У БДМУ на факультэтах «Лячэбная справа», «Педыятрыя», «Фармацыя» дзённае навучанне на першым курсе будзе каштаваць 4430 рублёў (летась было 4142, пазалетась — 3766). Танней будзе вучыцца медыка-прафілактычнай справе — 4064 рублі (летась было 3800). Самы дарагі факультэт — стаматалагічны. Там першы курс будзе каштаваць 5182 рублі, у той час як летась было 4844 рублі, пазалетась — 4404.
У МДЛУ кошт навучання на першым і другім курсах дзённай формы складзе ў новым годзе 3948 рублёў. Летась ён быў роўны 3690 рублям.
У Акадэміі кіравання за першы курс вочнікам давядзецца заплаціць 4330 рублёў. Летась кошт складаў 4050 рублёў.
Такім чынам, усе цэны выраслі на 7%. Адпаведна павышаны кошт навучання на старэйшых курсах усіх гэтых універсітэтаў і кошт завочнага навучання.
Названыя цэны могуць быць не канчатковымі: ВНУ могуць іх карэктаваць цягам навучальнага года, нават у чэрвені — так адбылося сёлета, напрыклад, у БДЭУ, БДТУ, БРУ.
Чытайце таксама
