Дэпутат Палаты прадстаўнікоў, былы прэс-сакратар МЗС і экс-амбасадар Беларусі ў Турцыі Андрэй Савіных — адзін з актыўных крытыкаў Захаду і еўрапейскіх каштоўнасцяў. Між тым яго дачка Лізавета даволі даўно жыве і працуе ў Вялікабрытаніі, якую афіцыйны Мінск лічыць недружалюбнай. «Люстэрка» даведалася падрабязнасці і спытала адыёзнага палітыка, ці не перашкаджаюць яму гэтыя факты настойліва абвінавачваць Захад у развязванні вайны ва Украіне і называць яго агрэсіўнай цывілізацыяй.
Андрэю Савіных 62 гады, ён былы беларускі дыпламат, працаваў у Міністэрстве замежных справаў з 1993 да 2019 года. Быў прэс-сакратаром МЗС, працаваў у прадстаўніцтве Беларусі ў ААН і іншых міжнародных арганізацыях у Жэневе. Пік яго дыпламатычнай кар’еры — пасада амбасадара Беларусі ў Турцыі і Іраку з 2013 па 2019 год.
У 2019-м стаў дэпутатам Палаты прадстаўнікоў, узначальвае Пастаянную камісію па міжнародных справах. Пасля смерці Уладзіміра Макея ў лістападзе мінулага года палітычныя аналітыкі называлі Савіных адным з магчымых кандыдатаў на пасаду кіраўніка МЗС.
Ужо як дэпутат ён неаднаразова выступаў з крытыкай краін Захаду. На яго думку, менавіта заходнія кампаніі падштурхнулі Расію пачаць вайну. Таксама Савіных адзначае, што «калектыўны Захад» хоча расколу Расіі, і мяркуе, што пасля заканчэння вайны ва Украіне заходнія краіны мусяць панесці адказнасць за свае дзеянні.
Да таго ж ён называе заходнюю цывілізацыю агрэсіўнай, прадракае развал яе эканомікі і абвінавачвае ў вымыванні каштоўных кадраў з Беларусі. А таксама лічыць, што Захад вядзе псіхалагічную вайну і наўмысна дэманізуе Лукашэнку і Пуціна.
У снежні 2022 года Польшча ўключыла Андрэя Савіных у санкцыйныя спісы. Цяпер яго «знаходжанне на тэрыторыі краіны непажаданае». Аднак у еўрапейскім санкцыйным спісе дэпутата няма.
«Чалавек, які прысвяціў значную частку сваёй кар’еры барацьбе з адмываннем грошай»
Увагу на тое, што 34-гадовая дачка Андрэя Савіных Лізавета жыве і працуе ў Вялікабрытаніі, звярнуў у сваім тэлеграм-канале перформер Уладзіслаў Бохан. Прааналізаваўшы акаўнты ў Facebook Андрэя Савіных і яго жонкі, ён адшукаў у сацсетках іх дачку Лізавету. У яе акаўнце ў LinkedIn пазначаныя месцы вучобы (Жэнева) і працы (Лондан).
Мяркуючы з інфармацыі, якая размешчаная ў профілі Лізаветы Савіных у сацыяльнай сетцы LinkedIn, з верасня 2022 года і да сёння дзяўчына працуе менеджэрам па распрацоўцы рашэнняў у галіне барацьбы з адмываннем грошай брытанскай фінансава-тэхнічнай карпарацыі Quantexa.
Да гэтага яна 11 гадоў адпрацавала ў найбуйнейшым па памеры актываў і рынкавай капіталізацыі банку Вялікабрытаніі HSBC.
Два тыдні таму Лізавета Савіных паведамляла пра свой удзел у профільнай канферэнцыі:
— Гэта сапраўды міжнароднае мерапрыемства з узрушальным складам дакладчыкаў і ўдзельнікаў дыскусіі. Для мяне як чалавека, які прысвяціў значную частку сваёй кар’еры барацьбе з адмываннем грошай, вялікі гонар удзельнічаць у абмеркаванні і прадстаўляць кампанію Quantexa.
Ёсць яшчэ адна Лізавета Савіных, у якой брытанскае грамадзянства?
Перформер Уладзіслаў Бохан таксама высветліў, што нейкая Лізавета Савіных (Elizaveta Savinykh) значыцца дырэктарам кампаніі Canabel Limited, якая займаецца нерухомасцю ў брытанскім горадзе Лідсе.
«Люстэрку» ўдалося адшукаць інфармацыю пра гэтую фірму на сайце брытанскага дзяржаўнага сэрвісу gov.uk. Паводле звестак гэтага рэсурсу, Canabel Limited займаецца купляй, продажам, здаваннем у арэнду і кіраваннем уласнай і арандаванай нерухомасці. Праўда, ні асобнага сайта, ні актыўных сацсетак гэтай кампаніі мы не знайшлі, што дзіўна для фірмы, якая вядзе справы ў такой сферы.
Акрамя гэтага, у інфармацыі пра кампанію на сайце gov.uk адзначаецца, што Лізавета Савіных мае брытанскае грамадзянства. І разам з нейкім грамадзянінам Канады Феліксам Антуанам Прэво Бурдаж 3 жніўня 2022 года яна стала дырэктарам Canabel Limited. Пра іншых заснавальнікаў ці работнікаў кампаніі звестак няма.
Пры гэтым таксама пазначана, што Лізавета Савіных нарадзілася ў снежні 1988 года. Гэтая інфармацыя супадае з тымі звесткамі пра дату нараджэння дачкі дэпутата, якія «Люстэрку» перадало аб’яднанне былых сілавікоў BELPOL.
Што кажуць сам дэпутат, яго дачка і брытанская кампанія?
Журналіст «Люстэрка» патэлефанаваў Андрэю Савіных і спытаў, ці праўдзівая інфармацыя пра тое, што ягоная дачка — грамадзянка Вялікабрытаніі і працуе ў кампаніях у гэтай краіне, але дыялогу з дэпутатам не атрымалася.
— Спадар з «Люстэрка», я такога сродку масавай інфармацыі не ведаю, таму размаўляць з вамі не буду, — сказаў палітык і павесіў трубку.
Мы паспрабавалі атрымаць каментар Лізаветы Савіных, але на момант публікацыі гэтага матэрыялу адказу не было.
Таксама мы даслалі запыт у кампанію Quantexa, каб даведацца, ці ў курсе яны, што дачка беларускага дэпутата і былога чыноўніка працуе ў іх. А таксама ці не асцерагаюцца яны праз гэтую ўцечку ў Беларусь адчувальнай інфармацыі, якая дапаможа ўладам абыходзіць санкцыі.
— У кампаніі Quantexa дзейнічаюць строгія правілы прыёму на працу і праграмы навучання, якія гарантуюць, што ўсе ўдзельнікі нашай каманды будуць адпавядаць высокім стандартам этычных паводзін, — гаворыцца ў адказе Quantexa. — Нашая кампанія мае надзейныя і эфектыўныя сродкі кантролю, якія гарантуюць бяспечнае і надзейнае кіраванне любой канфідэнцыйнай інфармацыяй — тэхнічнай, стратэгічнай, асабістай — у адпаведнасці з нашымі дамоўнымі і нарматыўнымі патрабаваннямі.
Чытайце таксама
