Вераніка Цапкала зноў адрэагавала на продаж з аўкцыёну арыштаванай мінскай кватэры, якая належыць яе сям'і. Яна апублікавала ў Facebook зварот да генпракурора Андрэя Шведа і людзей, якія набылі нерухомасць на таргах. Ад Шведа Цапкала запатрабавала адказаць на пытанні пра ўгоду, а пакупнікам кватэры прыгразіла выселіць іх адтуль і змусіць аплаціць арэндную плату за ўвесь тэрмін пражывання.
«9 красавіка 2024 года нашая адзіная ва ўласнасці кватэра, размешчаная па адрасе: г. Мінск, вул. Чарнышэўскага, д. 5, кв. 26, з другой спробы была прададзеная праз электронны аўкцыён „БелЮрЗабяспечанне“ па цане 395 720,27 беларускага рубля. Дадзеная кватэра была набытая мной і маім мужам у сумесным шлюбе, а таксама на яе маюць права нашыя двое няпоўнагадовых дзяцей», — напісала Вераніка Цапкала.
Яна нагадала, што ў лютым ужо звярталася ў пракуратуру, Следчы камітэт і Мінскі гарадскі суд з патрабаваннем правесці расследаванне з нагоды продажу нерухомасці. Тады яна выказала меркаванне, што рашэннем выставіць на таргі нерухомасць парушаецца ў тым ліку Канстытуцыя.
«У адказ я атрымала адпіскі, якія не ўтрымлівалі адказаў на пастаўленыя пытанні. Больш за тое, 15 сакавіка 2024 года супраць мяне была распачатая крымінальная справа па артыкулах ч. 1 арт. 357, ч. 3 арт. 361−1, ч. 2 арт. 367, арт. 369−1 Крымінальнага кодэкса Беларусі, якая абумоўленая маім зваротам у вышэйзгадныя ўстановы», — сцвярджае Цапкала.
Беларуска паведаміла, што паўторна адправіла зварот на імя генеральнага пракурора і міністра юстыцыі «з патрабаваннем растлумачыць працэдуру вяртання скрадзенай маёмасці і пазбаўленне няпоўнагадовых дзяцей адзінага месца пражывання ў краіне, дзе яны нарадзіліся і грамадзянамі якой яны ёсць».
Яна запатрабавала выкласці пазіцыю Генпракуратуры па пытаннях, ці парушаюць канфіскацыя і продаж кватэры з прапісанымі дзецьмі Канстытуцыю, Грамадзянскі кодэкс і іншыя дакументы, у тым ліку арт. 27 Канвенцыі ААН пра правы дзіцяці, у адпаведнасці з якім «дзеці маюць права на бяспечнае жыллё для свайго паўнавартаснага развіцця».
«Якімі прававымі актамі ці пастановамі рэгулюецца правапрымяняльная практыка, у адпаведнасці з якой нерухомая маёмасць серыйных забойцаў, гвалтаўнікоў дзяцей і людаедаў застаецца ў распараджэнні іх сем’яў, але адбіраецца з сем’яў грамадзян, што не здзяйснялі злачынстваў супраць чалавечнасці?» — спытала Цапкала.
Звярнулася яна і да людзей, якія набылі яе нерухомасць на таргах:
«Я чарговым разам звяртаюся да тых грамадзян, якія „сарвалі халяву“ і ўсё ж набылі нашую кватэру па значна заніжанай цане! Вы выдатна ведаеце, у чыёй уласнасці знаходзіцца гэтая маёмасць і што ў ёй пражываюць двое няпоўнагадовых дзяцей. Вы і вашая сям’я мусіце дакладна разумець, што па вяртанні ў Беларусь мы прыйдзем да вас з простымі беларусамі, прэсай, усімі тымі, хто не падтрымлівае скупшчыкаў крадзенага, і вы абавязаныя будзеце выселіцца з нашай кватэры і аплаціць арэндную плату за ўвесь тэрмін пражывання!»
Нагадаем, 9 красавіка праз электронны аўкцыён «БелЮрЗабяспечанне» з другой спробы прадалі арыштаваную нерухомасць сям'і Цапкалаў — Валерыя і Веранікі. Гаворка пра трохпакаёвую кватэру з машына-месцам. Нерухомасць у выніку набылі за 395 тысяч 720,27 рубля. Пачатковую цану маёмасці знізілі ў параўнанні з папярэднімі таргамі: першы раз ахвочых набыць гэта жыллё не знайшлося. У аўкцыёне 9 красавіка было трое ўдзельнікаў.
Валерый Цапкала ў мінулым кіраваў беларускім Паркам высокіх тэхналогій. Для ўдзелу ў прэзідэнцкай кампаніі 2020 года ён сабраў ініцыятыўную групу, ездзіў па краіне. Аднак ЦВК адмовіў яму ў рэгістрацыі праз тое, што сабраных подпісаў пасля праверкі аказалася менш за сто тысяч. Калі палітыка не дапусцілі да ўдзелу ў выбарах, яго жонка Вераніка далучылася да аб’яднанага штаба Святланы Ціханоўскай.
Валерый Цапкала пакінуў краіну ў ліпені 2020 года, асцерагаючыся пераследу. 9 жніўня з Беларусі з’ехала і Вераніка. Сям’я Цапкалаў асталявалася ў Латвіі.
На радзіме Валерыя Цапкалу завочна асудзілі на 17 гадоў калоніі ўзмоцненага рэжыму.
Чытайце таксама
