«Радыё Свабода» пацікавілася ў міністра замежных справаў Літвы Габрыэлюса Ландсбергіса пра тое, ці павінная Украіна таксама біць па вайсковых цэлях на тэрыторыі Беларусі. Адказ быў дыпламатычным, але цалкам канкрэтным.
— Я маю на ўвазе, што Украіна павінная мець магчымасць абараніць сябе. Калі Расія, асцерагаючыся, што аб’екты (вайсковыя. — Заўв. рэд.) могуць быць атакаваныя ў Расіі, можа перамясціць іх кудысьці яшчэ, то я думаю, што і выбар цэляў неабходна перанесці,-заявіў журналістам кіраўнік МЗС Літвы перад пачаткам саміту кіраўнікоў замежных справаў краін NATO ў Празе.
Нагадаем, сёння афіцыйны прадстаўнік урада ФРГ Штэфан Гебестрайт заявіў, што Германія зняла забарону для Украіны на выкарыстанне сваёй зброі для ўдараў па расійскіх вайсковых аб’ектах на тэрыторыі РФ.
Пентагон пацвердзіў, што адпаведнае рашэнне прынялі і ў Белым доме.
Раней пра сваю згоду заяўлялі Данія, Фінляндыя, Канада, Польшча, Вялікабрытанія і Швецыя. Францыя, Нідэрланды, Чэхія, Літва, Латвія і Эстонія выступаюць за змякчэнне абмежаванняў на выкарыстанне заходняй зброі.
Прэзідэнт Расіі Уладзімір Пуцін, каментуючы гэтыя выказванні, намякнуў на магчымасць удараў у адказ.
— Прадстаўнікі краін NATO, асабліва ў Еўропе, асабліва ў малых краінах, — яны павінныя наогул усведамляць, з чым яны гуляюць. Яны павінныя памятаць, што гэта, як правіла, дзяржава з невялікай тэрыторыяй з вельмі шчыльным насельніцтвам. І гэта фактар, які яны мусяць мець на ўвазе, перш чым казаць пра нанясенне ўдараў углыб расійскай тэрыторыі, — заявіў Пуцін.
