Беларусь развівае адносіны з дружалюбнымі краінамі і не страчваюцца кантакты з Еўрапейскім саюзам, заявіў Аляксандр Лукашэнка 22 ліпеня на нарадзе па сітуацыі ў прамысловасці. «Гэта нашыя суседзі — Еўрапейскі саюз. З імі трэба знайсці шляхі супрацоўніцтва», — удакладніў палітык. Нагадаем, у канцы чэрвеня ЕС увёў новыя санкцыі супраць нашай краіны, яны закранулі ў тым ліку некаторую мэблю, трактары, кабельную прадукцыю.
На гэтай нарадзе гаварылі і пра тое, што трэба займацца дыверсіфікацыяй экспарту.
«Галоўная нашая мэта — гэта дыверсіфікацыя экспарту. Мы ўсе ўмеем рабіць, але галоўнае — прадаць. Попыт на нашую прадукцыю ёсць. Дзяржавы, якія гатовыя купляць нашую прадукцыю, таксама ёсць», — адзначыў Аляксандр Лукашэнка.
Ён адзначыў, што ў гандлі «асноўныя два партнёры нашай краіны — Расія і Кітай».
«Гэта нашыя традыцыйныя партнёры. Гэта наш „якар“. Мы заякарыліся. І калі хтосьці думае, што „вось мы сыдзем з Расіі і Кітая, заўтра нас прымуць з распасцертымі рукамі“ — глупства поўнае. Так, мы невялікая экспартная эканоміка. Але трэба разумець, што гэта мільярды даляраў. Канкурэнцыя сур’ёзная, і з нашымі таварамі нас нідзе ніхто асабліва не чакае. Таму Расія і Кітай, асабліва Расія, — гэта наш традыцыйны рынак. Эканоміка — тут нікуды не падзенешся», — падкрэсліў Аляксандр Лукашэнка.
Палітык адзначыў, што Беларусь паспяхова развівае адносіны і з іншымі дружалюбнымі краінамі, не страчваюцца кантакты з Еўрапейскім саюзам. «Гэта нашыя суседзі — Еўрапейскі саюз. З імі трэба знайсці шляхі супрацоўніцтва. Калі ім трэба нешта купіць, а нам трэба прадаць у іх на рынку — гэта ўзаемавыгадны інтарэс», — звярнуў увагу Аляксандр Лукашэнка.
Раней, 3 ліпеня, Аляксандр Лукашэнка паскардзіўся на Літву і Польшчу, якія «ў аднабаковым парадку незаконна перакрылі Беларусі доступ да партоў на Балтыцы».
Нагадаем, Еўрасаюз у канцы чэрвеня прыняў санкцыі супраць беларускай эканомікі. Новыя абмежаванні скіраваныя на гандаль, паслугі, транспарт і перадухіленне абыходу наяўных санкцый. Віцэ-прэм'ер Пётр Пархомчык заявіў, што абмежаванні закранулі таксама мэблю і кабельную тэхніку, «якія Беларусь паспяхова экспартавала ў Еўропу».
Нашыя суседзі з ЕС — Латвія, Літва і Польшча — таксама актыўна ўводзяць санкцыі супраць нашай краіны, у тым ліку на нацыянальным узроўні. Да прыкладу, з 3 чэрвеня ўрад Літвы вызначыў новы пералік тавараў, якія забароненыя для імпарту з Беларусі і Расіі. Праз гэтыя санкцыі на літоўскай мяжы ўзнік перапалох — у пунктах пропуску людзей прасілі выкідваць прадукты, напоі, цыгарэты і іншыя тавары.
Чытайце таксама
