ЕС унёс у санкцыйны спіс 28 чалавек за датычнасць да рэпрэсій у Беларусі. Сярод іх — два намеснікі кіраўніка ГУБАЗіК, пракуроры, суддзі, начальнікі турмаў і СІЗА, а таксама прапагандысты, гаворыцца ў заяве Рады ЕС.
У панядзелак, 5 жніўня, Рада ЕС прыняла рашэнне ўвесці санкцыі ў дачыненні да яшчэ 28 асобаў за іх ролю ў рэпрэсіях і парушэннях правоў чалавека ў Беларусі.
Абмежавальныя меры былі ўведзеныя адносна двух намеснікаў начальніка Галоўнага ўпраўлення па барацьбе з арганізаванай злачыннасцю і карупцыяй (ГУБАЗіК) Міністэрства ўнутраных справаў.
«ГУБАЗіК — адзін з асноўных органаў, адказных за палітычныя пераследы ў Беларусі, уключаючы адвольныя і незаконныя арышты і жорсткае абыходжанне, у тым ліку катаванні, актывістаў і ўдзельнікаў грамадзянскай супольнасці», — гаворыцца ў дакуменце.
У спісы таксама ўключаныя розныя прадстаўнікі судовай сістэмы — пракуроры і многія суддзі, якія выносілі палітычна матываваныя прысуды, у тым ліку ў дачыненні да беларусаў, што пратэставалі супраць фальсіфікацыі прэзідэнцкіх выбараў 2020 года або проста выказвалі сваё меркаванне супраць беларускіх уладаў. Акрамя таго, абмежавальныя меры прымяняюцца і да кіраўнікоў розных папраўчых установаў (турмаў і следчых ізалятараў).
У санкцыйны спіс уключаныя:
- начальнік ГУБАЗіК Андрэй Ананенка;
- намеснік начальніка ГУБАЗіК Міхаіл Бедункевіч;
- намеснік начальніка ГУБАЗіК Дзмітрый Ковач;
- намеснік начальніка аддзела дзяржаўнага абвінавачання ўпраўлення Генеральнай пракуратуры па наглядзе за адпаведнасцю закону судовых рашэнняў па крымінальных справах Міхаіл Кавалёў;
- начальнік ПК-11 Віктар Дуброўка;
- начальнік турмы № 1 Гродна Павел Казакоў;
- намеснік начальніка турмы № 1 Гродна Васіль Каляда;
- начальнік ПК-4 у Гомелі Дзяніс Талсцянкоў;
- начальнік СІЗА № 1 Андрэй Цэдрык;
- суддзя Мінскага абласнога суда Вячаслаў Тулейка;
- суддзя Мінскага гарадскога суда Алена Ананіч;
- суддзя Гомельскага абласнога суда Анатоль Сотнікаў;
- суддзя Фрунзенскага раённага суда Мінска Андрэй Млечка;
- суддзя Магілёўскага абласнога суда Ігар Шведаў;
- пракурор Ірына Падкавырава;
- суддзя Ленінскага раённага суда Мінска Таццяна Шоцік;
- суддзя Гродзенскага абласнога суда Васіль Скок;
- суддзя Рэчыцкага раённага суда Станіслаў Іванюценка;
- суддзя Гомельскага абласнога суда Аляксей Хлышчанкоў;
- суддзя Магілёўскага абласнога суда Ігар Зямцоў;
- суддзя Маладзечанскага раённага суда Вольга Дубовік;
- суддзя Бабруйскага раённага суда Антон Дудаль;
- суддзя Жлобінскага раённага суда Мікалай Сергяевіч;
- уладальнік «Тэхнахімтрэйд» Віктар Шаўцоў.
У спіс таксама ўключаны шэраг прапагандыстаў — як гаворыцца ў рашэнні Рады ЕС, гэта «група даўніх прыхільнікаў Лукашэнкі, якія здабывалі выгаду з рэжыму». У іх ліку:
- генеральная дырэктарка БЕЛТА Ірына Акуловіч;
- вядоўца тэлеканала СТБ і старшыня Моладзевага савета парламента пры Нацыянальным сходзе Мікіта Рачылоўскі;
- экс-кіраўнік прэс-службы Лукашэнкі і доўгачасовы генеральны дырэктар БЕЛТА Дзмітрый Жук.
- супрацоўнік АНТ Аляксей Краквін.
У цэлым абмежавальныя меры ЕС супраць Беларусі цяпер распаўсюджваюцца на 261 фізічную асобу і 37 арганізацый.
Асобы з санкцыйнага спісу падпадаюць пад замарозку актываў, а грамадзянам і кампаніям ЕС забаронена даваць ім доступ да сродкаў. Фізічным асобам таксама забароненыя паездкі ў ЕС, у тым ліку транзітам.