У беларускіх дзяржСМІ актыўна абмяркоўваецца факт «выдалення» з сайта Дзярждэпартамента ЗША заявы былога дзяржаўнага сакратара Энтані Блінкена пра сітуацыю ў Беларусі, звярнула ўвагу выданне «Позірк».
Адзначаецца, што «на старонцы, дзе раней была апублікаваная заява, цяпер высвятляецца надпіс: „Прыносім прабачэнні за нязручнасці“. Сам тэкст з асуджэннем выбараў у Беларусі быў выдалены».
Пры гэтым, напрыклад, канал АНТ, ахарактарызаваўшы заяву Блінкена як «умяшанне ў будучыя выбары прэзідэнта Беларусі», заявіў, што «такое нахабства не сталі трываць нават у адміністрацыі Дональда Трампа. Цяпер, калі паспрабаваць перайсці на старонку Дзярждэпа ЗША, дзе было апублікаванае „асабліва каштоўнае меркаванне“ Блінкена што да выбараў у Беларусі, то замест пафаснага загалоўка з асуджальнымі прамовамі дзяржсакратара карыстальнікаў сустракае сарамлівае „Прыносім прабачэнні за нязручнасці…“»
На самай справе прапаганда (наўмысна ці не) ігнаруе тэкст, які ідзе пасля інфармацыі пра прабачэнні: «Мы ствараем архіў сайта State.gov у канцы кожнай прэзідэнцкай адміністрацыі. Гэта стандартная практыка з моманту заканчэння адміністрацыі Клінтана ў 2001 годзе. Калі патрэбны вам матэрыял адносіцца да папярэдняй адміністрацыі, вы можаце скарыстацца пошукам па нашых архіўных сайтах».
Такім чынам, заява Блінкена па Беларусі, як і іншыя дакументы са студзеня 2021-га да студзеня 2025 года, даступныя на архіўным сайце. У прыватнасці, згаданы дакумент знаходзіцца па гэтым адрасе.
