З моманту публікацыі інфармацыі пра знікненне спікеркі Каардынацыйнай рады Анжалікі Мельнікавай, якая жыла ў Польшчы, прайшло ўжо тры дні. Дагэтуль няма дакладнай інфармацыі, дзе знаходзяцца жанчына і яе дзве няпоўнагадовыя дачкі. Паведамлялася толькі, што яе экс-муж можа быць у Беларусі. З рэдакцыяй «Люстэрка» звязаўся чытач з Нясвіжа, які сцвярджае, што нядаўна сустрэў у горадзе былога мужа Анжалікі Мельнікавай у кампаніі з дочкамі. Паспрабавалі праверыць гэтую інфармацыю.
Паводле чытача «Люстэрка» Яўгена (імя змененае), днямі ён бачыў Андрэя Мельнікава, былога мужа Анжалікі, разам з іх дочкамі Таняй (сем гадоў) і Аняй (13 гадоў) у Нясвіжы. Мужчына таксама падрабязна апісаў абставіны сустрэчы, аднак мы не можам іх апублікаваць з меркаванняў бяспекі.
— Гэта дакладна быў Андрэй, разам з ім — дзве іх дзяўчынкі, — сцвярджае чытач. — Я спачатку здзівіўся, бо думаў, што яны ўсе за мяжой. А потым прачытаў навіны пра знікненне Анжалікі і пра тое, што яе муж можа знаходзіцца ў Беларусі.
З дапамогай аб’яднання былых сілавікоў BELPOL «Люстэрка» знайшло беларускі нумар тэлефона, зарэгістраваны на былога мужа Мельнікавай. На званок адказаў мужчына, але пасля ўдакладнення, ці гаворыць журналіст з Андрэем Мельнікавым, суразмоўца скончыў гутарку. Пасля гэтага тэлефон абанента перастаў адказваць, а потым яго наогул выключылі.
Адзначым, што Анжаліка Мельнікава нарадзілася і вырасла ў Нясвіжы, скончыла мясцовую гімназію.
У суботу, 29 сакавіка, у эфіры польскага тэлеканала TVN24 намеснік кіраўніка Аб’яднанага пераходнага кабінета і кіраўнік Народнага антыкрызіснага ўпраўлення Павел Латушка таксама сцвярджаў, што былы муж спікеркі КР выехаў у Беларусь. Пазней палітык удакладніў, што гэта адбылося 23 сакавіка.
А раніцай 31 сакавіка кіраўнік НАУ паведаміў, што і мабільны тэлефон Анжалікі Мельнікавай з 19 сакавіка таксама знаходзіцца ў Беларусі. «Гэта выяўлена намі тэхнічным спосабам», — напісаў Латушка.
У каментары «Люстэрку» палітык падкрэсліў, што ўпэўнены ў дакладнасці гэтай інфармацыі, але адмовіўся расказаць, якім менавіта спосабам удалося высветліць месцазнаходжанне тэлефона Мельнікавай.
Раней прэс-сакратар МУС Польшчы Яцак Дабжыньскі паведамляў, што, паводле звестак польскіх і партнёрскіх службаў, Мельнікава цягам некалькіх тыдняў знаходзіцца за межамі Польшчы.
Нагадаем, сувязь са спікеркай КР Анжалікай Мельнікавай знікла 25 сакавіка. Павел Латушка афіцыйна паведаміў пра гэта ў праваахоўныя органы Польшчы. Разам з жанчынай зніклі і яе дочкі, якія жылі з ёю ў Варшаве.
У КР адзначылі, што прадстаўнікі дэмакратычных сіл Беларусі застаюцца прыярытэтнымі мэтамі спецслужбаў рэжымаў у Беларусі і Расіі.
Чытайце таксама
