У апошнія дні ў адзіным пункце пропуску на польска-беларускай мяжы адбываўся сапраўдны калапс. «Люстэрка» пісала пра тое, што некаторыя беларусы былі вымушаныя праводзіць у чарзе больш за 45 гадзін, а беларускія мытнікі абвінавачвалі ў тым, што здарылася, сваіх польскіх калег. Мы пагаварылі з палякамі, якія працуюць недалёка ад пункта пропуску «Тэрэспаль», дзе сабраліся вялізныя чэргі беларусаў, якія хочуць трапіць дадому на святы.
Мяркуючы з інфармацыі сайта Памежнай службы Польшчы, сітуацыя ў пункце пропуску «Тэрэспаль» палепшылася. Калі 24 і 25 снежня час чакання ў чарзе складаў больш за 40 гадзін, то станам на першую палову дня 26 снежня для гэтага неабходныя ўсяго 9 гадзін. Пра тое, што чарга істотна зменшылася, «Люстэрку» расказала і супрацоўніца памежнага гатэля Zajazd Jędrula:
— Цяпер сітуацыя ўжо спакойная, чарга зменшылася, і зменшылася істотна. Я бачу, што машыны пад’язджаюць і адразу едуць у пункт пропуску. Мабыць, там пачалі працаваць хутчэй.
Паводле супрацоўніцы, у мінулыя дні да іх у гатэль прыходзіла шмат людзей, але знайсці вольнае месца шанцаў не было:
— У нас усе месцы былі зарэзерваваныя, але тыя, хто прыходзіў да нас у гэтыя выходныя, куплялі гарбату і каву, карысталіся туалетамі.
Біяпрыбіральняў ці пунктаў з гарачымі напоямі ўздоўж чаргі ля мяжы ў гэтыя калядныя выходныя не было. Адна з нешматлікіх магчымасцяў купіць гарачыя напоі і ежу — запраўка за 6 кіламетраў ад пункта пропуску. Яе супрацоўнік расказаў «Люстэрку», што кліентаў апошнімі днямі было вельмі шмат.
— У першую чаргу попыт быў на прыбіральню, ежу і розныя напоі, — кажа касір АЗС. — Шмат людзей біліся. Праз што — не ведаю, але не раз прыходзілі да нас са скрываўленым вокам, носам ці яшчэ чым-небудзь. Але цяпер хвост чаргі знаходзіцца ўжо блізу пункта пропуску, і на запраўку амаль ніхто не заходзіць.
Дзяжурны камісарыята паліцыі ў Тэрэспалі не стаў расказваць «Люстэрку» падрабязнасці інцыдэнтаў, якія адбываліся ў чарзе ў калядныя выходныя, — каментаваць гэта можа толькі прэс-сакратар, а ў яго 26 снежня выходны. Але ў цэлым, паводле паліцэйскага, сітуацыя была спакойная.
— Паліцыя ўвесь час патрулявала дарогу, уздоўж якой утварылася чарга, — гэта наш абавязак, і мы яго выконваем, — кажа дзяжурны паліцыі. — Цяпер, на шчасце, чарга значна меншая, чым была яшчэ ўчора.
Чытайце таксама
