Уладзімір Пуцін не хоча заканчэння вайны Расіі супраць Украіны, таму яго неабходна да гэтага прымусіць. Пра гэта заявіў прэзідэнт Украіны Уладзімір Зяленскі падчас размовы з журналістамі ў панядзелак, 9 снежня, перадае «Настоящее время».
Украінскі лідар, у прыватнасці, адказаў, ці згаджаецца Украіна на замарозку вайны і якімі мусяць быць гарантыі бяспекі, каб краіна падпісала дакументы для дасягнення міру, улічваючы, што новаабраны прэзідэнт ЗША Дональд Трамп, паводле паведамленняў, хоча замарозіць вайну.
«Калі мы кажам пра замарожаны канфлікт, калі паміж намі, то мы пра гэта гаварылі. Я сказаў, мы больш чым хто-кольвек у свеце хочам заканчэння вайны. І, безумоўна, дыпламатычнае заканчэнне вайны прынясе большае захаванне жыццяў. І мы хочам гэтага. Але я падкрэсліў і прэзідэнту Макрону, і прэзідэнту Трампу: вы ўбачыце, што Пуцін не хоча заканчэння гэтай вайны, таму яго трэба прымусіць», — падкрэсліў Зяленскі.
Ён падкрэсліў, што прымусіць Расію можна толькі калі Украіна моцная.
«Моцная Украіна перад любой дыпламатыяй — гэта моцная на полі бою. Гэта моцная армія, гэта пакеты зброі і да таго падобнае, гэта дальнабойныя сістэмы, безумоўна, І ATACMS, і TAURUS, і Storm Shadow, і SCALP. Усё гэта нам вельмі-вельмі моцна патрэбнае», — заявіў Зяленскі, падкрэсліўшы, што выключна для ўдараў па вайсковых цэлях.
Нагадаем, 7 лістапада ў Парыжы прайшлі перамовы прэзідэнта Украіны Уладзіміра Зяленскага з абраным прэзідэнтам ЗША Дональдам Трампам пры пасярэдніцтве прэзідэнта Францыі Эманюэля Макрона.
Па іх выніках Трамп заявіў, што прэзідэнт Украіны Уладзімір Зяленскі хоча завяршыць вайну і заключыць мір.