Нястомная прапагандыстка з Гродна Вольга Бондарава, якая ваюе з беларускай мовай, васількамі, прэзерватывамі на касах, лацінкай і дзіцячымі цацкамі, здаецца, празмерна захапілася. Выкрываючы айчынны шоу-бізнес у недастатковай любові да Аляксандра Лукашэнкі, яна назвала яго нявестку «змагаркай».
Выказваючы сваё абурэнне з нагоды складу артыстаў у праграме «Не будите спящих солдат» у межах урачыстага сходу з нагоды Дня Перамогі ў Палацы Рэспублікі, яна звярнула ўвагу на прозвішча Ганны Сялук — пад гэтым псеўданімам хаваецца нявестка Лукашэнкі, жонка яго сярэдняга сына Дзмітрыя, Ганна Лукашэнка.
«Колькі ні пішуць патрыёты пра тое, што непрыгожа да патрыятычных мерапрыемстваў прыцягваць змагароў і дзяржпераваротчыкаў, пральня ўпарта працягвае іх цягнуць. Каторы раз мы сустракаем прозвішча змагаркі Ганны Сялук на канцэртах з удзелам Прэзідэнта Рэспублікі Беларусь Аляксандра Рыгоравіча Лукашэнкі. Сёння на мерапрыемстве ў гонар Дня Перамогі 9 траўня — зноў тыя ж граблі», — напісала Бондарава.
Яна таксама зрабіла рэпост паведамлення з афіляванага з ёю канала, у якім выказваецца абурэнне тым фактам, што «суполку тащат в проекты, связанные с именами членов семьи Лукашенко, предварительно обернув в красно-зеленый флаг».
Пазней Бондарава адрэдагавала гэтыя паведамленні, прыбраўшы з іх згадку Ганны Сялук. Відаць, ёй патлумачылі, каго яна назвала «змагаркай».
Летась Вольга Бондарава абвінаваціла начальніка абласной міліцыі Дзмітрыя Разянкова ў паклёпе. Пасля яна некалькі дзён прасіла прабачэння «ва ўсіх, каго незаслужана пакрыўдзіла сваімі словамі», і падкрэслівала, што «не мела намераў дыскрэдытаваць дзяржаўную ўладу ці нейкім чынам пахіснуць асновы дзяржаўнасці».
Нагадаем, у 2020-м у Беларусі прайшлі прэзідэнцкія выбары, а пасля абвяшчэння афіцыйных вынікаў, згодна з якімі перамог свёкар Ганны Лукашэнка — Аляксандр Лукашэнка, — у краіне ўспыхнулі пратэсты, якія вельмі жорстка душыліся дзейнай уладай. Прыхільнікі Лукашэнкі тады актывізаваліся і на іншым фронце: пачалі ладзіць аўтапрабегі ў ягоную падтрымку, праводзіць «патрыятычныя» мітынгі «за Беларусь». Тут і аказалася запатрабаванай творчасць яго нявесткі, пачаўся ўзлёт яе кар’еры.
Мяркуючы з рэестру інтэлектуальнай уласнасці, за тры няпоўныя гады нявестка Лукашэнкі стварыла 106 песень, сярод іх «Ах, Александр», «Бульба-дэнс» і гімн Генеральнай пракуратуры.
19 снежня 2023 года Аляксандр Лукашэнка прысудзіў прэмію «За духоўнае адраджэнне» і спецыяльныя прэміі дзеячам культуры і мастацтва. Адной з узнагароджаных спецыяльнай прэміяй стала «паэт-песеннік Ганна Сяргееўна Лукашэнка (псеўданім Ганна Сялук)». Яна атрымала прэмію «за вялікі асабісты ўклад у развіццё сучаснага музычнага мастацтва, рэалізацыю сацыяльна значных культурных ініцыятываў».
Чытайце таксама
