Аляксандр Лукашэнка 6 лютага падпісаў указ «Аб разглядзе зваротаў грамадзян Рэспублікі Беларусь, што знаходзяцца за мяжой, па пытаннях здзяйснення імі правапарушэнняў». Дакумент дагэтуль не апублікаваны, але ў Генпракуратуры яго актыўна каментуюць. У прыватнасці, у ведамстве расказалі, што рашэнне камісіі будзе канчатковым.
У Генпракуратуры расказалі, што камісія, якую ўзначаліць генпракурор Андрэй Швед, будзе разглядаць звароты беларусаў.
«У звароце мусіць быць адлюстраваная інфармацыя пра прычыны, з якіх грамадзянін пакінуў тэрыторыю Рэспублікі Беларусь, абставіны, у сувязі з наяўнасцю якіх асоба мяркуе, што можа быць прыцягнутая да адміністрацыйнай і (або) крымінальнай адказнасці, жаданне вярнуцца ў Рэспубліку Беларусь і гатоўнасць пасля вяртання выконваць патрабаванні заканадаўства, паважаць дзяржаўныя сімвалы і нацыянальныя традыцыі нашай краіны», — растлумачылі ў ведамстве.
Звароты, якія паступяць, камісія мусіць разгледзіць максімум цягам двух месяцаў. Пры неабходнасці старшыня камісіі, то-бок генпракурор, мае права падоўжыць гэты тэрмін да трох месяцаў.
Па выніках разгляду зваротаў на паседжанні камісіі шляхам адкрытага галасавання простай большасцю галасоў будзе прынятае адно з наступных рашэнняў:
- пра інфармаванне грамадзяніна аб адсутнасці ў дачыненні да яго на дату звароту ў камісію распачатага адміністрацыйнага працэсу па правапарушэннях, якія прадугледжваюць спагнанне ў выглядзе адміністрацыйнага арышту, нявыкананай пастановы аб накладанні адміністрацыйнага спагнання ў выглядзе адміністрацыйнага арышту, распачатай крымінальнай справы, пастановы аб прызнанні падазраваным, прыцягненні ў якасці абвінавачанага;
- пра мэтазгоднасць адмены абранай у дачыненні да грамадзяніна меры стрымання або замены яе мякчэйшай;
- пра мэтазгоднасць спынення ў дачыненні да грамадзяніна справы аб адміністрацыйным правапарушэнні, вызвалення яго ад крымінальнай адказнасці ў парадку і на ўмовах, прадугледжаных заканадаўствам;
- пра інфармаванне грамадзяніна наконт яго працэсуальнага становішча па справе аб адміністрацыйным правапарушэнні, па крымінальнай справе.
Рашэнне камісіі будзе канчатковым, адзначылі ў ведамстве.
Нагадаем, 6 лютага Аляксандр Лукашэнка падпісаў указ пра стварэнне камісіі для працы з ахвочымі вярнуцца на радзіму. Пра гэта ён заявіў, прымаючы з дакладам генеральнага пракурора Андрэя Шведа. Менавіта камісія будзе вырашаць, могуць беларусы вярнуцца на радзіму ці не.