Суд у Вільнюсе прызнаў грамадзяніна Беларусі Мацвея Бяляя вінаватым у нападзе на амбасаду Беларусі 20 красавіка 2023 года і асудзіў яго на 11 месяцаў абмежавання волі са скіраваннем на папраўчыя работы ва ўстановах аховы здароўя або сацыяльнага абслугоўвання, піша «Радыё Свабода».
Пры гэтым, як адзначаецца ў рашэнні, суд залічыў тэрмін знаходжання Мацвея Бяляя пад вартай падчас дасудовага расследавання.
«Згодна з артыкулам 66 Крымінальнага кодэкса Літоўскай Рэспублікі, адзін дзень часовага затрымання і арышту прыраўноўваецца да двух сутак абмежавання волі, таму Мацвей Бяляй адбыў пакаранне», — гаворыцца ў рашэнні суда.
Суд прызнаў, што дзеянні беларуса не нанеслі сур’ёзнай шкоды маёмасці амбасады.
Па другім абвінавачанні, звязаным са спробай уцёкаў з-пад арышту (ч.1 арт. 22 і ч. 1 арт. 241 КК Літвы), грамадзяніна Беларусі апраўдалі, бо не знайшлі дастатковых доказаў. Суд звярнуў увагу на тое, што канваіры адключылі відэарэгістратар, таму поўнага запісу знаходжання беларуса ў бальніцы, з якой ён нібыта спрабаваў збегчы, няма.
«Я абскарджу гэты прысуд. Мне нават не далі яго перакладу. Я магу падаць апеляцыю цягам 20 дзён пасля атрымання перакладу», — расказаў «Свабодзе» Бяляй.
Паводле беларуса, 31 студзеня 2024 года Найвышэйшы адміністрацыйны суд Літвы разглядае яго апеляцыйную скаргу на рашэнне суда першай інстанцыі пра яго дэпартацыю на той падставе, што ён уяўляе «пагрозу нацыянальнай бяспецы Літвы».