Курсанта Акадэміі МУС, 21-гадовага Іллю Нарышкіна, будуць судзіць у Гродне па двух артыкулах: пра здраду дзяржаве вайскоўцам і пра ўдзел у вайне на тэрыторыі іншай дзяржавы, паведамляе «Наша Ніва».
Маладому чалавеку выстаўленыя абвінавачанні па ч. 2 арт. 365 КК (Здрада дзяржаве асобай, на якую распаўсюджваецца статус вайскоўца) і ч.1 арт. 361−3 КК (Удзел у вайне на тэрыторыі іншай дзяржавы, вярбоўка або падрыхтоўка асобаў да такога ўдзелу). Яму пагражае да 25 гадоў калоніі.
Як адзначае «Наша Ніва», па другім артыкуле часцей за ўсё судзілі людзей, якія выказвалі намер паехаць ваяваць на баку Украіны ці перапісваліся з фэйкавымі ботамі палка Каліноўскага, створанымі беларускімі спецслужбамі.
Суд над курсантам пачнецца 22 ліпеня ў Гродзенскім абласным судзе. Паседжанні пройдуць у закрытым рэжыме, іх будзе весці Юрый Казакевіч — суддзя, які раней выносіў «палітычныя» прысуды па адміністрацыйных справах.
Як высветліла выданне з дапамогай Digital intelligence team і базы «Кіберпартызан», Нарышкін вучыўся на трэцім курсе крымінальна-выканаўчага факультэта Акадэміі МУС, падчас навучання быў актывістам — у прыватнасці, выступаў на розных конкурсах і ўдзельнічаў у інтэлектуальнай гульні «Вежа» на тэлеканале «Беларусь 2».
Хлопец родам са Слоніма, але частку дзяцінства пражыў у Гродне. Яго бацька — украінец, нарадзіўся ў Крывым Рогу, скончыў авіяцыйнае вучылішча і працаваў інжынерам у розных краінах.